!انصرفوا

 بما اني عشت طفولتي برا البلد، كنا انا واخوتي نفتخر ببلدنا ونتخيل انها رمز للقوة وللشجاعة زي كل فلسطيني عايش برا البلد، كنا نحب حدا يسألنا “من وين انتو” عشان نتعمق بمعالم وجه لما انقوله “انا من فلسطين”. كنت ومازلت احس انه احنا مميزين بمجرد انّا فلسطينية. مميزين إما بصورة الفلسطيني المناضل المهدور حقو  وإما بصورة الفلسطيني الارهابي، بس على كلتا الحالتين هويتنا مميزة، وقضيتنا تترأس القضايا الدولية

بس إلي عايش بالبلد غير كليا! رمز الوطنية والنضال بختلف، ورمز حب الوطن وخدمته كمان يختلف. قليل ما تلاقي حدا بدو يعيش بالبلد، الهجرة صارت طموح وإلي عايش برا فلسطين “نيالو”! وبلاد الغرب صارت مصباح علاء الدين. وصار إلي بدو يضل في بلده لانه بحبها غريب ومش واعي. وإلي بدافع عن القضية فهو لسا ما عرف انها “انباعت”. وإلي بشتغل في البلد بستنى الراتب عشان ينبسط وياكل. وإلي بقاطع اسرائيل اقتصاديا بس في المناسبات لانه كل اشي بيجي من اسرائيل. وإلي بتظاهر فهو بنادي في بوق مخزوق. والمناضل صار اسمو ناشط. والحِداد العام صار يخسرنا يوميتنا. وإلي بقاوم بالحجر وبستشهد بكون هبيلة وراحت عليه ! ن

والناس إلي بتفكر هيك بطلت تستحي تقولك وبكل ثقة “مبروك عليك الهوية الفلسطينية خدها واشرب ميتها”  و “الله يقوي اليهود علينا” والبعض الآخر بقول “انضل تحت رحمة اسرائيل ولا الخلافة الاسلامية” و “اهل المخيمات عايشين احسن منا بدفعوش كهربا ومي” و “اذا الرئيس والحكومة مش عاملين اشي ليش لأنا اعمل”. وصارت الاجيال الجديدة تتربى على حليب التنوفا وبس تكبر بدها تدرس في اميركا لانه بلدنا مش نافعة ! ت

 ايها المارون بين الكلمات العابرة لا تشوفو الجانب المليان من الكاسة ولا تتفائلوا خيرا، بس خذوا حصتكم وانصرفوا !!! ـ